ენერგეტიკულ კავშირში გაწევრიანებით საქართველო ელექტროენერგიის ბაზრის ლიბერალიზაციის ვალდებულებას იღებს. ბაზარზე გაჩნდებიან ახალი მოთამაშეები, ელექტროენერგიის საფასურს კი ბაზარი დაადგენს. ბაზრის ლიბერალიზაციისთვის საჭიროა, რომ პარლამენტმა მიიღოს ახალი საკანონმდებლო ნორმა, რომელიც დღეს მოქმედ გამანაწილებელ კომპანიებს განსხვავებულ მოთხოვნებს დაუყენებს. კერძოდ, ერთმანეთისგან სავალდებულო წესით უნდა გაიმიჯნოს ქსელის ფლობა და ელექტროენერგიის მიწოდება. ქსელის მფლობელმა კომპანიებმა კი საკუთარ ქსელზე დაშვება ნებისმიერი კომპანიისთვის ხელმისაწვდომი უნდა გახადონ. სემეკში ამბობენ, რომ ბაზრის ლიბერალიზაციის შემდეგ, მოსახლეობას მათთვის სასურველი კომპანიის შერჩევა გამარტივებული წესით, სემეკის საიტიდანვე შეეძლება.