► საუდის არაბეთში ე.წ. ისლამურმა სახელმწიფომ რამდენიმე ტერაქტი განახორციელა - ერთი აფეთქება მუსლიმებისთვის წმინდა ქალაქ მედინაში მოხდა, სადაც რამადანის ბოლოს მილიონობით მუსლიმი პილიგრიმი ჩადის. მეორე ბომბი საუდის არაბეთის აღმოსავლეთში, უმეტესწილად შიიტებით დასახლებულ კატიფის რეგიონში განხორციელდა. ტერაქტი მოხდა ასევე ქვეყნის სიდიდით მეორე ქალაქ ჯედაში, ამერიკის საკონსულოს მახლობლად, სადაც ტერორისტებმა დანაღმული მანქანა ააფეთქეს;
► ცენტრალური ერაყი, ქალაქ რამადას დღევანდელი სავალალო მდგომარეობა - შენობების უმეტესობა ქალაქში მიწასთანაა გასწორებული და საცხოვრებლად უვარგისია. სირიასა და ერაყში 10 მილიონამდე ადამიანმა დაკარგა საცხოვრებელი და ასობით ათასი ადამიანი საომარ მოქმედებებს ემსხვერპლა;
► უნგრეთისა და ავსტრიის საზღვარზესატვირთო მანქანების 25-კილომეტრიანი რიგი გადაიჭიმა. ეს შეფერხება განაპირობა ავსტრიის სასაზღვრო კონტროლის გამკაცრებულმა რეჟიმმა, რომელიც ვენამ შემოიღო უნგრეთიდან ევროკავშირის ცენტრისკენ დაძრული არალეგალური ემიგრაციის ნაკადების შესაკავებლად;
► გაზას სექტორში ბოლო 6 წლის მანძილზე საკვების, მედიკამენტებისა და სათამაშოების სახით, პირველი ჰუმანიტარული ტვირთი შევიდა, რომელიც იქ თურქეთმა გაგზავნა;
► 4 ივლისს ამერიკის კოსმოსურმა სააგენტო ნასამ, იუპიტერის ორბიტაზე უპილოტო კოსმოსურ ხომალდ "ჯუნოს" შესვლა აღნიშნა. ხომალდი 20-თვიან სამეცნიერო მისიას დაიწყებს, რომლის დროსაც იუპიტერის ორბიტას ორკვირიანი მარშრუტებით შემოუფრენს ხოლმე. "ჯუნო" პლანეტის ზედაპირსა და მაგნიტურ ველს შეისწავლის.