ბათუმის მე-13 საერთაშორისო კონფერენციის - „საქართველოს ევროპული გზა-სტაბილურობა, განვითარება და მრავალფეროვნება“ ფარგლებში საქართველოს თავდაცვის მინისტრი მესამე თემატურ სესიას დაესწრო. თინათინ ხიდაშელი ერთ-ერთ მომხსენებლად წარდგა მოდელირებულ დისკუსიაზე - „თანამედროვე უსაფრთხოების არქიტექტურა: გამოწვევები და შესაძლებლობები“.
არის თუ არა ევროპული უსაფრთხოების სტრატეგია მზად თანამედროვე გამოწვევების - ჰიბრიდული ომის, ტერორიზმისა და საემიგრაციო კრიზისის საპასუხოდ? როგორ ვითანამშრომლოთ უფრო მჭიდროდ უსაფრთხოების გაძლიერების მიზნით? რა ინსტრუმენტები აქვს ევროკავშირს სტაბილურობისა და უსაფრთხოების უზრუნველყოფისთვის „აღმოსავლეთ პარტნიორობის“ რეგიონში? რამდენად სახიფათოა წარსულში დაბრუნებისა და გავლენის სფეროების აღდგენის მცდელობა? მოსალოდნელია თუ არა რუსეთის შემდგომი აგრესია „აღმოსავლეთ პარტნიორობისა“ და ევროკავშირის წევრი ქვეყნების მიმართ? რა ბერკეტები გააჩნია რუსეთს აღმოსავლეთ ევროპის ქვეყნების ევროინტეგრაციის პროცესის შესაფერხებლად? რა როლი აქვს რუსეთზე ენერგოდამოკიდებულებას თანამედროვე უსაფრთხოების არქიტექტურაზე? როგორ უნდა იქნას დაცული ქვეყნის დამოუკიდებელი საგარეო პოლიტიკა და ევროპული მისწრაფება? - ეს იმ საკითხების ჩამონათვალია, რომლის შესახებაც სესიის მონაწილეებმა იმსჯელეს.
„ყოველთვის ძალიან მნიშვნელოვანია, როდესაც ასეთი გამოცდილების ადამიანები საუბრობენ ევროპულ უსაფრთხოებაზე. საბედნიეროდ, პანელი უფრო მეტად რუსეთის მიერ გლობალური საფრთხეების შესახებ დისკუსიას დაეთმო და არ ეხებოდა მხოლოდ საქართველოს. ჩვენთვის, სწორედ, ეს არის მნიშვნელოვანი, რომ თემის იზოლაცია არ მოხდეს საქართველოს ან უკრაინის ფარგლებში, რადგან საფრთხე გაცილებით დიდია. რუსული სახელმწიფოს ინტერესი არ შემოიფარგლება კავკასიით და შავი ზღვით. ამის გაცნობიერება ყოველთვის ძალიან მნიშვნელოვანია. ვარშავის სამიტის შემდეგ საამისოდ ძალიან ნაყოფიერი ნიადაგი შეიქმნა და დღეს უკვე საუბარი მიდის იმაზე თუ როგორ შევაჩეროთ საფრთხე, როგორ უზრუნველყოს ცივილიზებულმა სამყარომ, რომ რუსეთის ხელისუფლება დაჯდეს იმ ტიპის დიალოგის მაგიდასთან, სადაც პრობლემების მოგვარებაზე იქნება საუბარი და არა მორიგ კონფლიქტზე, რომლის გამომწვევიც რუსეთის ფედერაციაა,“ - განაცხადა თინათინ ხიდაშელმა.
თინათინ ხიდაშელთან ერთად სესიაზე მომხსენებლებად სამხრეთ კავკასიასა და საქართველოში კრიზისის საკითხებში ევროკავშირის სპეციალური წარმომადგენელი ჰერბერტ ზალბერი; პოლონეთის რესპუბლიკის სენატორი, თავდაცვის ყოფილი მინისტრი ბოგდან კლიხი; უნგრეთის დემოკრატიის სახალხო ფონდის ცენტრის პრეზიდენტი (DEMKK) იშტვან ჯიარმატი და თურქეთის რესპუბლიკის საგარეო საქმეთა ყოფილი მინისტრი იაშარ იაკიში წარსდგნენ.