მობილიზაციისა და რეზერვის კონცეფციის თემაზე მიმდინარე კონფერენცია დასრულდა
საქართველოს შეიარაღებული ძალების მობილიზაციისა და რეზერვის კონცეფციის თემაზე მიმდინარე სამდღიანი კონფერენცია დღეს დასრულდა.
კონფერენციაში ჩრდილოატლანტიკური ალიანსის ეროვნული სარეზერვო ძალების კომიტეტის მიერ გამოგზავნილი აშშ-ის, დანიის, ბრიტანეთის, ჩეხეთის, უნგრეთისა და გერმანიის შეიარაღებული ძალების ექსპერტები მონაწილეობდნენ. კონცეფციის განხილვას ასევე დაესწრნენ საქართველოში მოქმედი არასამთავრობო ორგანიზაციის წარმომადგენლები და დამოუკიდებელი ექსპერტები.
ღონისძიებაზე მოწვეულმა სტუმრებმა მობილიზაციისა და რეზერვის კონცეფცია საქართველოს შეიარაღებული ძალების გენერალური შტაბის G1 პირადი შემადგენლობის რეზერვისა და მობილიზაციის დაგეგმვის სამმართველოსთან ერთად დეტალურად განიხილეს.მონაწილეებმა სხვადასხვა სინდიკატებში მუშაობის შედეგები შეაჯამეს და რეკომენდაციები შეიმუშავეს.
ეფექტიანი და ხელმისაწვდომი მობილიზაციისა და რეზერვის სისტემა ეროვნული თავდაცვის სისტემის სრულყოფილად ფუნქციონირებისთვის მეტად მნიშვნელოვანია. „შეიარაღებული ძალების მობილიზაციისა და რეზერვის კონცეფცია“ იქნება პროდუქტი, რომელშიც თანაბრად აისახება სამხედროების ხედვა, როგორი რეზერვი სჭირდება შეიარაღებულ ძალებს და, მოქალაქეების მზადყოფნა, თუ როგორი ფორმით მიიღებენ ისინი მონაწილეობას ქვეყნის თავდაცვაში.