გარემოსა და ბუნებრივი რესურსების დაცვის მინისტრის მოადგილემ მაია ბითაძემ ქიმიური, ბიოლოგიური, რადიაციული და ბირთვული საფრთხეების წინააღმდეგ ბრძოლის უწყებათშორისი საკოორდინაციო საბჭოს სხდომაში მიიღო მონაწილეობა.
მაია ბითაძემ შეხვედრის მონაწილეებს სამინისტროს მიერ ბირთვული და რადიაციული რისკების შემცირების მიზნით განხორციელებულ, მიმდინარე და დაგეგმილ პროექტებზე ესაუბრა. ასევე გააცნო ბოლო ერთი წლის განმავლობაში განხორციელებული ძირეული რეფორმები, მათ შორის ინსტიტუციური, სამართლებრივი და ტექნოლოგიური, რამაც ერთის მხრივ გააუმჯობესა ბირთვული და რადიაციული წყაროების უსაფრთხოების ხარისხი, ხოლო მეორეს მხრივ საშუალება მისცა ბირთვული და რადიაციული საქმიანობის ლიცენზიის მაძიებლებსა და ლიცენზიანტებს ისარგებლონ ახლადდანერგილი ერთი სარკმლის პრინციპით სააგენტოს მიერ გაწეული ელექტრონული მომსახურეობებით, რამაც მნიშვნელოვნად შეამცირა ადმინისტრაციული წარმოების ვადები. მინისტრის მოადგილემ ხაზი გაუსვა 2014 წლის ჰააგის სამიტის კომუნიკეს წარმატებით აღსრულების საკითხს, რომლის ფარგლებშიც ქვეყნიდან განხორციელდა მაღალგამდიდრებული ურანის რეპატრიაცია და საქართველო 2016 წლის ბირთვული უსაფრთხოების სამიტის ფარგლებში დაჯილდოვდა მსოფლიო ბირთვულ უსაფრთხოებაში შეტანილი წვლილის თვალსაზრისით.