დღეს, დილიდან საქართველოს თავდაცვის მინისტრი 2008 წლის აგვისტოს ომში დაღუპული ქართველი სამხედრო მოსამსახურეების ხსოვნას პატივს მიაგებს. მუხათგვერდის ძმათა სასაფლაოს შემდეგ, ლევან იზორია ქალაქ გორში გაემგზავრა და გენერალური შტაბის უფროსთან ერთად, გორის ციხის მახლობლად აღმართული სვეტი, რომელიც საქართველოსთვის თავდადებული შვილების ხსოვნას ეძღვნება, გვირგვინით შეამკო.
ლევან იზორიამ და გენერალ-მაიორმა ვახტანგ კაპანაძემ გვირგვინით შეამკეს გორში ერთიანი საქართველოსთვის რუსეთ-საქართველოს ომში დაღუპულ გმირთა მემორიალიც.
გვირგვინით შემკობის ცერემონიალებს თავდაცვის მინისტრის პირველი მოადგილე ლელა ჩიქოვანი, გენერალური შტაბის უფროსის მოადგილე, პოლკოვნიკი ნიკოლოზ აგლაძე და საქართველოს შეიარაღებული ძალების სხვა წარმომადგენლები დაესწრნენ.