11 აგვისტოს, შინდისში გმირულად დაღუპული მებრძოლების ხსენების დღეს შინდისის გმირთა სახელობის სკვერში შინდისში დაღუპული გმირების ხსოვნისადმი მიძღვნილი მემორიალი თავდაცვის მინისტრის მოადგილემ ნუკრი გელაშვილმა გვირგვინით შეამკო.
შინდისში დაღუპული გმირების ხსოვნისადმი მიძღვნილი მემორიალის გვირგვინით შემკობის ცერემონიალს ქ.ბათუმის მერმა გიორგი ერმაკოვმა უმასპინძლა. ღონისძიებას ასევე ესწრებოდნენ სახმელეთო ჯარების დასავლეთის სარდალი, პოლკოვნიკი შალვა ჯაბახიძე, აჭარის მთავრობის წევრები, ქალაქ ბათუმის მუნიციპალიტეტის წარმომადგენლები და გარდაცვლილ მებრძოლთა ოჯახის წევრები.
“8 წლის წინ ჩვენმა ქვეყანამ და ჩვენმა ხალხმა განიცადა უდიდესი ტრაგედია. ჩვენ დავკარგეთ ტერიტორიების ნაწილი და დავკარგეთ ეს გმირები, რომელთაც თავიანთი უძვირფასესი სიცოცხლე შესწირეს თავიანთ ქვეყანას. მე მინდა მადლობა ვუთხრა მათ მშობლებს, ამ ვაჟკაცების აღზრდისათვის და მივუსამძიმრო ოჯახის წევრებს. მოგეხსენებათ, დღევანდელი დღე არის შინდისის გმირების დღე. ჩვენი ბიჭები უთანასწორო ბრძოლაში დაიღუპნენ, მაგრამ მე ვიტყოდი რომ ეს არის თანამედროვე საქართველოს ისტორიაში ერთ-ერთი ყველაზე უფრო გამორჩეული გმირობის მაგალითი, რომელზეც ალბათ მომავალი თაობები უნდა აღიზარდონ. ჩვენ, დღეს ამ სკვერში დავრგეთ 17 ხე სიმბოლურად, რომელიც მათი სიცოცხლის გაგრძელების სიმბოლოა.“- განაცხადა ნუკრი გელაშვილმა.
ცერემონიალი საქართველოს სახელმწიფო ჰიმნით გაიხსნა. ჰიმნის დასრულებისთანავე მოწვეულმა სტუმრებმა მონუმენტი ყვავილებით შეამკეს. ღონისძიების ოფიციალური ნაწილის დასრულების შემდეგ აგვისტოს ომის თემატიკაზე ფოტო გამოფენა „რუსეთ-საქართველოს აგვისტოს ომი“ მოეწყო. შინდისში გმირულად დაღუპული მებრძოლების ხსენების დღის აღსანიშნავად სკვერში სიმბოლურად 17 ხის ნერგი დარგეს.