ერთიანი ნაციონალური მოძრაობის ინფორმაციით, ჯარისა და პოლიციის დიდ ნაწილს არჩევნებში ხმის მიცემის შესაძლებლობა არ ექნება. პარტიის საერთაშორისო მდივნის განცხადებით, სამხედრო ნაწილებში მივიდა მინისტრ ლევან იზორიას ზეპირი ბრძანება, რომლის მიხედვით ჯარისკაცების უდიდესი ნაწილი დარჩება საკუთარ ნაწილებში.
ნაციონალური მოძრაობის განცხადებას უსაფუძვლოს უწოდებენ საქართველოს თავდაცვის სამინისტროში. უწყებამ დღეს სპეციალური განცხადება გაავრცელა, სადაც არჩევნების დღისთვის მთავრობის მიმდინარე წლის აგვისტოს დადგენილება განმარტა.
ბრალდებებს გამოეხმუარა შინაგან საქმეთა სამინისტროც. უწყებაში აცხადებენ, რომ მინისტრმა ბრძანება განსაკუთრებულ რეჟიმზე გადასვლის შესახებ წინასაარჩევნო პერიოდში და არჩევნების დღეს უსაფრთხოების უზრუნველყოფის მიზნით გამოსცა და რეჟიმი ხელს არ უშლის საქართველოს შინაგან საქმეთა სამინისტროს მოსამსახურეებს აქტიური საარჩევნო უფლების რეალიზებაში.
ცენტრალურ საარჩევნო კომისიაში განმარტავენ, რომ ის სამხედროები, რომლებიც არჩევნებში მონაწილეობას სპეციალური სიების მეშვეობით იღებენ, ხმას დისლოკაციის ადგილის მიხედვით მისცემენ და მხოლოდ პროპორციულ არჩევნებში მიიღებენ მონაწილეობას. სხვებს კი ექნებათ შესაძლებლობა, მივიდნენ რეგისტრაციის ადგილზე. რაც შეეხება სამხედროებს, რომლების დისლოკაციის ადგილი რეგისტრაციის ადგილს ემთხვევა, ისინი შეძლებენ მიიღონ მონაწილეობა როგორც პროპორციულ, ისე მაჟორიტარულ არჩევნებში.
საქართველოს მთავრობის 2016 წლის 24 აგვისტოს დადგენილების თანახმად, 2016 წლის 8 ოქტომბრის საქართველოს პარლამენტის არჩევნების დღისთვის თავდაცვის სამინისტროს სამხედრო ნაწილებში სპეციალური საარჩევნო უბნები არ იქმნება.