იუსტიციის სამინისტროში, შინაგან საქმეთა მინისტრის მოადგილის ხელმძღვანელობით, უწყებათაშორისი კომისიის მეთერთმეტე სხდომა გაიმართა. შალვა ხუციშვილის თქმით, პარტიებს ადმინისტრაციული რესურსების გამოყენებასთან დაკავშირებით, საჩივრებით არ მიუმართავთ. შინაგან საქმეთა მინისტრის მოადგილის განმარტებით, სხდომაზე ორი მთავარი საკითხი განიხილეს. შეიძლება თუ არა ჩაითვალოს დარღვევად, საარჩევნო შტაბში, ირაკლი სესიაშვილისა და საუბნო კომისიის წევრების შეხვედრა. კიდევ ერთი საკითხი, სკოლის ავტობუსის გამოყენებას გულისხმობს. შალვა ხუციშვილმა ყურადღება მარნეულსა და ზუგდიდში დაგეგმილ განმეორებით არჩევნებზეც გაამახვილა. შინაგან საქმეთა მინისტრის თქმით, მისი უწყება იღებს პასუხისმგებლობას, რომ ამ რეგიონებში მეორე ტური მშვიდ გარემოში ჩატარდება.