#პოლიტიკა
გაწყვეტს თუ არა თბილისის მერია ხელშეკრულებას „სითი პარკთან“, ჯერჯერობით უცნობია. ამ მოთხოვნით დედაქალაქის მთავრობას დღეს საკრებულოს დეპუტატების ნაწილმა მიმართა და კომპანიის გაუქმებაც მოითხოვა. ალეკო ელისაშვილმა და დავით ზურაბიშვილმა განაცხადეს, რომ კომპანიამ ბოლო ორი წლის განმავლობაში 62 მილიონი ლარი ამოიღო, დედაქალაქის ბიუჯეტში კი მხოლოდ 18 მილიონი გადარიცხა. ელისაშვილი მერიას „სითი პარკთან“ გაფორმებული ხელშეკრულების გაუქმებასა და ჯარიმის თანხის, 25 მილიონი ლარის, მომავალი წლის ბიუჯეტში გათვალისწინებისკენ მოუწოდებს. დეპუტატები ამბობენ იმასაც, რომ კომპანია ხელშეკრულების პირობებს არ ასრულებს: მას არც ავტოსადგომი აუშენებია და თანხა არც პარკირების მოწყობისთვის დაუხარჯავს.