საქართველოს შეიარაღებული ძალების I საარტილერიო ბრიგადას დაარსებიდან 23 წელი შეუსრულდა. საზეიმო ცერემონიალი დღეს ვაზიანში, ბრიგადის სამწყობრო მოედანზე გაიმართა.
ღონისძიების დაწყებამდე საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ საქართველოს ტერიტორიული მთლიანობისთვის წარმოებული საბრძოლო მოქმედებების დროს დაღუპული არტილერისტების მემორიალი გვირგვინით შეამკო.
საზეიმო ღონისძიება ეროვნული გვარდიის სამხედრო-საჩვენებელმა ორკესტრმა საქართველოს სახელმწიფო ჰიმნით გახსნა. პირადმა შემადგენლობამ და მოწვეულმა სტუმრებმა საქართველოს ტერიტორიული მთლიანობისთვის და საერთაშორისო მისიებში დაღუპული ქართველი სამხედრო მოსამსახურეების ხსოვნას წუთიერი დუმილით პატივი მიაგეს.
გენერალური შტაბის უფროსმა, გენერალ-მაიორმა ვახტანგ კაპანაძემ სამწყობრო მოედანზე შეკრებილ პირად შემადგენლობას სიტყვით მიმართა, ბრიგადის 23 წლის იუბილე მიულოცა და პროფესიულ საქმიანობაში წარმატებები უსურვა. გენერალ-მაიორმა ვახტანგ კაპანაძემ სამსახურებრივი მოვალეობის შესრულებისას გამოჩენილი მაღალი პროფესიონალიზმისა და ქვეყნის თავდაცვისუნარიანობის განმტკიცების საქმეში შეტანილი წვლილისთვის 12 სამხედრო მოსამსახურე უწყებრივი მედლებით დააჯილდოვა. I საარტილერიო ბრიგადის 48 წარჩინებულ სამხედრო მოსამსახურეს კი მადლობა გამოეცხადა.
დაჯილდოების ცერემონიალზე საქართველოს საპატრიარქოსთან არსებული მეფე თამარის სახელობის სკოლა პანსიონის ფოლკლორულმა ანსამბლმა „არსიანმა“ „მრავალჟამიერი“ შეასრულა. I საარტილერიო ბრიგადის მოძღვარმა, მამა დავითმა კი, სამწყობრო მოედანზე შეკრებილი ბრიგადის შემადგენლობა დალოცა.
ღონისძიების დასრულების შემდეგ გენერალ-მაიორმა ვახტანგ კაპანაძემ სამხედროებთან ერთად ბრიგადის ტერიტორიაზე, სიმბოლურად, ათი კვიპაროსის ხე დარგო.
საზეიმო ღონისძიების ფარგლებში ბრიგადის ტექნიკის გამოფენა და სხვადასხვა სპორტული ღონისძიებები გაიმართა.
I საარტილერიო ბრიგადის იუბილეს აღმოსავლეთ სარდლობის სარდალი, პოლკოვნიკი შავლეგო ტაბატაძე; დასავლეთ სარდლობის სარდალი, პოლკოვნიკი შალვა ჯაბახიძე; I საარტილერიო ბრიგადის მეთაური, პოლკოვნიკი ზურაბ თაბუკაშვილი; ჯარების ლოგისტიკური უზრუნველყოფის სარდალი, პოლკოვნიკი იოსებ ლოლაძე; წვრთნებისა და სამხედრო განათლების სარდალი, პოლკოვნიკი მალხაზ მაკარაძე და სამხედრო მოსამსახურეების ოჯახის წევრები დაესწრნენ.
I საარტილერიო ბრიგადას მონაწილეობა აქვს მიღებული საქართველოს ტერიტორიული მთლიანობისთვის წარმოებულ ბრძოლებში. ბრიგადის პირადი შემადგენლობა ასევე აქტიურად მონაწილეობს ავღანეთის რესპუბლიკაში მიმდინარე ISAF-ის სამშვიდობო მისიაში.