რეინჯერთა მომზადების სკოლაში მზვერავის მომზადების კურსის გამოშვების ცერემონიალი გაიმართა. საზეიმო ღონისძიებას საქართველოს შეიარაღებული ძალების გენერალური შტაბის უფროსი, გენერალ-მაიორი ვახტანგ კაპანაძე, წვრთნებისა და სამხედრო განათლების სარდალი, პოლკოვნიკი მალხაზ მაკარაძე და გენერალური შტაბის სხვა წარმომადგენლები დაესწრნენ.
გენერალური შტაბის უფროსმა სამწყობრო მოედანზე შეკრებილ წარჩინებულ კურდამთავრებულებს სიტყვით მიმართა. გენერალ-მაიორმა ვახტანგ კაპანაძემ მზვერავთა კურსის მნიშვნელობაზე ისაუბრა და სამხედრო მოსამსახურეებს პროფესიულ საქმიანობაში წარმატებები უსურვა.
“მინდა თითოეულ ინსტრუქტორს მადლობა გადავუხადო, ვინაიდან მათ მიერ გაწეული შრომა ღირს იმ სიხარულად, რაც დღეს ჩვენ დავინახეთ მებრძოლებში. არ უნდა დაგვავიწყდეს, რომ ეს ის ბიჭები არიან, რომლებიც მისიისთვის ჯერ გაემგზავრებიან გერმანიაში და შემდეგ გერმანულ კონტიგენტთან ერთად ავღანეთში, საკმაოდ რთული მისიის შესასრულებლად. დარწმუნებული ვარ, რომ ეს მისიაც იქნება წარმატებული, ვინაიდან ამ მებრძოლებმა მიიღეს შესაბამისი ცოდნა, გამოცდილება და აითვისეს უნარ-ჩვევებიც, რომლებიც მათ დასჭირდებათ.“- განაცხადა გენერალ-მაიორმა კაპანაძემ.
რეინჯერთა სკოლაში გამართული ცერემონიალი სახელმწიფო ჰიმნით გაიხსნა. ღონისძიების მონაწილეებმა ტერიტორიული მთლიანობისთვის და სხვადასხვა საბრძოლო მოქმედებებში დაღუპული გმირების ხსოვნას წუთიერი დუმილით პატივი მიაგეს. დასასრულს კი, გენერალ-მაიორმა ვახტანგ კაპანაძემ და პოლკოვნიკმა მალხაზ მაკარაძემ 36 წარჩინებულ სამხედრო მოსამსახურეს სერტიფიკატები გადასცეს.
მზვერავთა მომზადების კურსში სახმელეთო ჯარების დასავლეთ სარდლობის სადაზვერვო ქვედანაყოფების სამხედრო მოსამსახურეები მონაწილეობდნენ. კურსი თერთმეტი კვირის განმავლობაში მიმდინარეობდა და თეორიულ და პრაქტიკულ მეცადინეობებს მოიცავდა.