ვაზიანში, საქართველოს შეიარაღებული ძალების IV მექანიზირებული ბრიგადის ბაზაზე, ჩრდილოატლანტიკური ალიანსის პირველი დონის შემფასებელთა ჯგუფის 33-ე კურსი დაიწყო. სწავლება, რომელშიც 19-ი ქვეყნის 40-მდე ოფიცერი მონაწილეობს, ნატოს ოპერატიული შესაძლებლობების შეფასებისა და უკუკავშირის პროგრამის ფარგლებში მიმდინარეობს. კურსის მიზანი ნატოს ძალებთან, ალიანსის პარტნიორი ქვეყნების თავსებადობის გაზრდაა.
მონაწილეებს მისასალმებელი სიტყვით მიმართეს საქართველოს შეიარაღებული ძალების აღმოსავლეთის დაჯგუფების სარდალმა, პოლკოვნიკმა შავლეგო ტაბატაძემ და ნატოს შემფასებელთა კურსის დირექტორმა, მაკედონიის შეიარაღებული ძალების ვიცე-პოლკოვნიკმა იგორ კუზმანოვსკიმ.
სწავლებაში საქართველოს გარდა ნატოს წევრი და პარტნიორი ქვეყნების შეიარაღებული ძალების წარმომადგენლები მონაწილეობენ. აღნიშნული კურსის გავლის შემდეგ ისინი ნატოს სწრაფი რეაგირების ძალებში მონაწილე IV მექანიზირებული ბრიგადის მე-12 ბატალიონის „ჩარლი“ ასეულის წვრთნებს დაესწრებიან და მათ შესაძლებლობებს შეაფასებენ.