აუდიტის სამსახურმა 2016 წლის 8 ოქტომბრის არჩევნებზე პოლიტიკური პარტიების ფინანსური საქმიანობის მონიტორინგი წარმოადგინა.

პარტიების მიერ დეკლარირებული შემოსავლების მიხედვით, ყველაზე დიდი ოდენობის შემოწირულობა პოლიტიკურ გაერთიანებებს შორის „ქართულმა ოცნებამ“ მიიღო - 19 005 219 ლარი.

შემდეგ მოდის „სახელმწიფო ხალხისთვის“ 4 278 541 ლარი, „ერთიანი ნაციონალური მოძრაობა“ - 1 063 514 ლარი.

„პატრიოტთა ალიანსი“ - 1 019 650 ლარი, “თავისუფალი დემოკრატები“ 686 945 ლარი.

სხვა დანარჩენი სუბიექტების მიერ მიღებული შემოწირულობა სამ მილიონ ლარზე მეტს შეადგენს.

დეკლარირებული ხარჯები კი ასე გამოიყურება:

„ქართული ოცნება“ - 22 212 663 ლარი

“სახელმწიფო ხალხისთვის“ - 4 396452 ლარი

„პატრიოტთა ალიანსი“ - 2 391 046 ლარი

„ერთიანი ნაციონალური მოძრაობა“ - 2 524 362 ლარი

“თავისუფალი დემოკრატები“ - 1 694 793 ლარი.

სხვა საარჩევნო სუბიექტების საარჩევნო ხარჯების ჯამური მოცულობა 6 მილიონ ლარზე მეტია.

გენერალური აუდიტორის მოადგილის ნინო ლომჯარიას განცხადებით, საერთო ჯამში 1000-ზე მეტი პირის შემოწირულობა იქნა შესწავლილი სხვადასხვა პოლიტიკური პარტიების მიმართ. 100-ზე მეტი პირი იქნა გამოკითხული, 40 გამოკითხვაზეა დაბარებული, 250 000 ლარის ჯარიმა სხვადასხვა პოლიტიკური პარტიების წარმომადგენლებს დაეკისრა.

საერთო ჯამში, აუდიტის სამსახურმა 50 საჩივარი განიხილა. ყველაზე დიდი ოდენობით ჯარიმა ორი პოლიტიკური პარტიის - “სახელმწიფო ხალხისთვის“ და „პატრიოტთა ალიანსის“ შემომწირველებს დაეკისრა.

აქედან “სახელმწიფო ხალხისთვის“ სამი პირის მასალები პროკურატურაშია გადაგზავნილი, რომელიც სისხლის სამართლის დანაშაულს შეიცავს.

პოლიტიკური პარტიების ფინანსური მონიტორინგის სამსახურის უფროსის ზურაბ აზნაურაშვილის განცხადებით, დაფიქსირდა რამდენიმე პირი, რომელმაც განახორციელეს აკრძალული შემოწირულობა სხვადასხვა პარტიების სასარგებლოდ, ასეთ შემთხვევაში ჯარიმა ორმაგია.

იმ შემთხვევაში თუ დადგინდა ვინ გადასცა თანხა შემომწირველს, უშუალოდ მესამე პირის პასუხისმგებლობის საკითხი დადგება, წინააღმდეგ შემთხვევაში, ჯარიმას შემომწირველი იხდის.

ასევე, აუდიტის სამსახურს სამი საქმე აქვს გადაგზავნილი პროკურატურაში, ერთი ეს ეხება სავარაუდოდ, ვარშალომიძის ბინების გადაცემის საკითხს, არასამთავრობო ორგანიზაციების მიერ მიწოდებულ ინფორმაციას „ერთიანი ნაციონალური მოძრაობის“ მხრიდან მარნეულში შშმ პირებისთვის ეტლების გადაცემას და მესამე, გორში, სავარაუდოდ, ოქრუაშვილის მხრიდან საკვები პროდუქტების დარიგებას.

აუდიტის სამსახური არჩევნების მეორე ტურის პარტიების ფინანსური საქმიანობის შესახებ ინფორმაციას ერთ თვეში გამოაქვეყნებს.