უზენაესი სასამართლოს გადაწყვეტილებას, რომლის მიხედვითაც, ექსპერტ ლევან ჩაჩუას საქმეზე სააპელაციო სასამართლოს მიერ გამოტანილი გამამართლებელი განაჩენი ძალაში დარჩა, გარდაცვლილი პრემიერმინისტრის ზურაბ ჟვანიას ძმა გამოეხმაურა.
გოგლა ჟვანია აცხადებს, რომ ის ჩაჩუას პროცესს არასოდეს დასწრებია, რადგან მისთვის პრიორიტეტი არ იყო. თუმცა მისთვის გაუგებარია სასამართლოს გადაწყვეტილება.
პარლამენტის თავმჯდომარე კი აცხადებს, რომ საზოგადოებაში დღესაც არსებობს კითხვები ზურაბ ჟვანიას გარდაცვალებასთან დაკავშირებით, თუმცა ირაკლი კობახიძეს იმედი აქვს, რომ ყველა კითხვას პასუხი გაეცემა.
უზენაესმა სასამართლომ ზურაბ ჟვანიას საქმის სასამართლო-სამედიცინო ექსპერტის ლევან ჩაჩუას გამამართლებელ განაჩენზე პროკურატურის საჩივარი დაუშვებლად ცნო.
პროკურატურის საკასაციო სარჩელი, რომლითაც სახელმწიფო ბრალდება თბილისის საქალაქო სასამართლოს მიერ გამოტანილი და სააპელაციო სასამართლოს მიერ ძალაში დატოვებული გამამართლებელი განაჩენის შეცვლას ითხოვდა, უზენაესი სასამართლოს სისხლის სამართლის საქმეთა პალატამ დაუშვებლად ცნო.
ამ გადაწყვეტილებით ძალაში დარჩა ზურაბ ჟვანიას საქმეზე, სასამართლო-სამედიცინო ექპერტ ლევან ჩაჩუას მიმართ ორი ინსტანციის მიერ გამოტანილი განაჩენი, რომლითაც ჩაჩუა გამართლდა.