საქართველოს პრეზიდენტის საგარეო ურთიერთობათა მდივნის, თენგიზ ფხალაძის განცხადებით, უკრაინის მიერ გაერო-ს უშიშროების საბჭოზე რუსეთსა და ოკუპირებულ აფხაზეთს შორის ე.წ. შეთანხმების გაფორმების საკითხის განხილვის ინიცირება ერთობლივი მუშაობის შედეგია.
„ჩვენ არაერთხელ გვითქვამს, რომ ჩვენი ერთ-ერთი მთაქვარი ამოცანაა, საქართველოს თემა მაქსიმალურად აქტიურად იყოს წამოწეული მსოფლიო დღის წესრიგში და ასევე, არაერთხელ გაგვიმახვილებია ყურადღება იმაზე, რომ მნიშვნელოვანია მოხდეს ჩვენი პრობლემატიკის განზოგადება. ისევე, როგორც საქართველოს პრეზიდენტი თავის გამოსვლებში ყოველთვის ახსენებს საქართველოს და უკრაინას და ყოველთვის ცდილობს, განაზოგადოს და უფრო ფართო ჭრილში წამოაყენოს ეს პრობლემა, დღეს უკრაინას ჰქონდა რა საშუალება, ვინაიდან არის უშიშროების საბჭოს წევრი, ერთობლივი მუშაობით მოხდა ამ საკითხის ინიცირება“, - განაცხადა ფხალაძემ.
ამის შესახებ კომენტარი ფხალაძემ საქართველოს პრეზიდენტისა და გაერო-ში აშშ-ის ელჩის შეხვედრის შემდეგ გააკეთა.
თენგიზ ფხალაძის განცხადებით, საუბარი შეეხო უსაფრთხოებასთან დაკავშირებულ საკითხებს. ასევე, ახალი ადმინისტრაციის პირობებში საქართველოს მხარდაჭერის თემას.
„ჩვენთვის მნიშვნელოვან საკითხებზე მივიღეთ მხარდაჭრა“, - აცხადებს ფხალაძე.
გიორგი მარგველაშვილი სამანტა პაუერს პარიზში, „ღია მმართველობის პარტნიორობის“ სამიტის ფარგლებში შეხვდა.