თბილისის მერია "ნაციონალურ მოძრაობას" არასწორი ინფორმაციის გავრცელებაში ადანაშაულებს.
დედაქალაქის მთავრობა არ ადასტურებს, რომ კრწანისში ოცი ათას კვადრატულ მეტრამდე ტერიტორიის იჯარით გაცემა იგეგმება.
საკრებულოს ოპოზიციური ფრაქციის წევრების მტკიცებით, მერია აბანოებიდან ბაგრატიონის ძეგლამდე გამწვანებული ტერიტორიის კერძო კომპანიისთვის 15-წლიანი ვადით გადაცემას აპირებს და ეს საკითხი საკრებულოს განსახილველად უახლოეს პერიოდში უნდა გადაეგზავნოს.
ასეთ შემთხვევაში ,,ნაციონალური მოძრაობის” წევრები ვარაუდობენ, რომ კომპანიამ შესაძლოა ხეების გაჩეხვის ხარჯზე სხვადასხვა ინფრასტრუქტურის მშენებლობა დაიწყოს.
პასუხად მერიამ პირველი ნოემბრის სხდომის კენჭისყრის ანგარიში წარმოადგინა, რომლის მიხედვით, კერძო კომპანიას იჯარით და დაკიდული ბაღების მოსაწყობად ტერიტორიის მხოლოდ 6 მეტრი ფართობი გადაეცა. სანაცვლოდ კი, კომპანიამ გორგასლის ქუჩის მიმდებარე სკვერში 450 ათასი ლარის ღირებულების კეთილმოწყობის სამუშაოები უნდა ჩაატაროს.
როგორც ირკვევა, საკითხს თავის დროზე მხარი სევდია უგრეხელიძემაც დაუჭირა.