თბილისი ევროპიდან მილოცვებს იღებს. 2017 წლის პირველი ნახევარი - ეს არის სავარაუდო თარიღი, როდესაც საქართველოს მოქალაქეებისთვის ევროკავშირის ქვეყნებთან უვიზო რეჟიმი ამოქმედდება.
რამდენიმეთვიანი ლოდინის შემდეგ ვიზალიბერალიზაციის შემაფერხებელი ბოლო საკითხი გადაწყვეტილია. ევროპარლამენტი, ევროპული საბჭო და ევროკომისია უვიზო მიმოსვლის ე.წ. შეჩერების მექანიზმის კომპრომისულ ვარიანტზე შეთანხმდა.
შეთანხმებიდან რამდენიმე საათში განახლებული რეგულაცია უკვე დაამტკიცა ლიბეს კომიტეტმა. შეჩერების მექანიზმის ახალ ვარიანტს ევროპარლამენტის სხდომაზე კენჭს მომავალ კვირას უყრიან. ეს იქნება ბოლო ეტაპი საქართველოსა და უკრაინის ვიზალიბერალიზაციის გზაზე.
ქართული მხარე უვიზო მიმოსვლის ამოქმედებას უახლოეს პერიოდში ელის. საბოლოო გადაწყვეტილების მიღებამდე ევროპული საბჭოს და ევროპარლამენტის პირველი პირები ოფიციალურ თბილისს სრულ მხარდაჭერას უცხადებენ.