აშშ-ს ცენტრალური დაზვერვის სააგენტოს ინფორმაციით, რუსეთი ფარულად მოქმედებდა, რათა საარჩევნო მარათონში დონალდ ტრამპი დაწინაურებულიყო - ამის შესახებ ინფორმაციას BBC ამერიკულ პრესაზე დაყრდნობით ავრცელებს.
„ნიუ-იორკ ტაიმსში“ გამოქვეყნებულ სტატიაში აღნიშნულია, რომ დაზვერვის სააგენტო რუსეთის ჩარევაში დარწმუნებულია.
ამერიკის არჩეული პრეზიდენტის დონალდ ტრამპის გუნდი CIA-ის ინფორმაციას უარყოფს და აცხადებს: „ესენი არიან ადამიანები, რომლებიც ამბობდნენ, რომ სადამ ჰუსეინს მასობრივი განადგურების იარაღი ჰქონდა“.
აშშ-ს არჩევნებში ჩარევას რუსული მხარეც კატეგორიულად უარყოფს.
პარასკევს, აშშ-ს პრეზიდენტმა ბარაკ ობამამ ბრძანება გასცა, დაეწყოთ გამოძიება კიბერ-თავდასხმების სერიაზე. მან რუსეთი აშშ-ს არჩევნებში ჩარევაში დაადანაშაულა.
კიბერ-შეტევის მთავარი სამიზნე იყო „დემოკრატიული პარტიის“ ელექტრონული წერილები და, კონკრეტულად, პრეზიდენტობის კანდიდატი ჰილარი კლინტონი.
როგორც ოფიციალურმა პირებმა „ნიუ იორკ ტაიმსთან“ ინტერვიუში განაცხადეს, ისინი დარწმუნებული არიან, რომ რუსეთმა ჰაკერული თავდასხმა განახორციელა და დემოკრატების დოკუმენტები, რომლებიც უკანონოდ მოიპოვა, „ვიკილიქსს“ გადასცა.
„დემოკრატებმა“ საჯაროდ განაცხადეს, როდესაც მათი ეროვნული კომიტეტის წევრისა და კლინტონის საარჩევნო კამპანიის ხელმძღვანელის ჯონ პოდესტას ელექტრონულ ფოსტას ჰაკერებმა შეუტიეს.
მოგვიანებით, პოდესტას ელექტრონული წერილები „ვიკილიქსმა“ გამოააშკარავა და გამოაქვეყნა.
„აშშ-ს ცენტრალური დაზვერვის სააგენტომ გამოავლინა ადამიანები, რომლებიც კავშირში არიან რუსეთის მთავრობასთან, რომელიც „ვიკილიქსს“ აწვდის ათასობით გატეხილი ელექტრონული ფოსტის მასალებს დემოკრატების ეროვნული კომიტეტიდან, მათ შორის, ჰილარი კლინტონის საარჩევნო კამპანიის ხელმძღვანელის მიმოწერებს“ - განაცხადა „უოშინგტონ პოსტთან“ ინტერვიუში CIA-ის წარმომადგენელმა.
წინასაარჩევნო კამპანიის პერიოდში, დონალდ ტრამპი აქეზებდა რუსეთს და ამბობდა, რომ რუსეთმა „აღმოაჩინა“ კლინტონის ელექტრონული წერილები, მოგვიანებით კი განაცხადა, რომ ეს სარკაზმი იყო და არა რეალური განცხადება.
თეთრი სახლის სპიკერის, ერიკ შულცის, განცხადებით, პრეზიდენტ ბარაკ ობამას სურს, რომ გამოძიება ბოლომდე მივიდეს, ვინაიდან ამ საკითხს ძალიან სერიოზულად აღიქვამს.
უცნობია, გასაჯაროვდება თუ არა გამოძიების შინაარსი და მასალები.
წყარო: BBC