თბილისის საკრებულოს 2017 წლის დედაქალაქის ბიუჯეტის დაზუსტებული პროექტი გუშინ გადაეგზავნა.

მუნიციპალური ტრანსპორტი, საგზაო ინფრასტრუქტურა, გამწვანება, განათლება, ჯანდაცვა და სოციალური მიმართულებები - ეს ის პრიორიტეტებია, რომელიც დედაქალაქის მთავარ საფინანსო დოკუმენტში აქტუალურ საკითხად რჩება.

როგორც საკრებულოს უმრავლესობის წევრი რიმა ბერაძე განმარტავს, 2017 წლის ბიუჯეტის დაზუსტებულ დოკუმენტში კომუნალური ვაუჩერებისთვის თანხა გაზრდილია. კერძოდ, სოციალურად დაუცველ ოჯახებს, რომელთა ქულაც 70 ათასიდან 200 ათასამდე აქვთ, აბონენტის ნომერზე, 16 ლარის ნაცვლად, ელექტროენერგიის, წყლის და დასუფთავების გადასახდელად 20 ლარი დაერიცხებათ.

რიმა ბერაძე აცხადებს, რომ 2017 წლის წარმოდგენილ ფინანსურ დოკუმენტში თბილისის მუნიციპალიტეტში ადმინისტრაციული ხარჯები 22 მილიონ 300 ათასი ლარით შემცირდა, მათ შორის საკრებულოში მილიონ 400 ათასი ლარით.

ჯერჯერობით უცნობია - შევა თუ არა კიდევ რაიმე ცვლილებები 2017 წლის მთავარ ფინანსურ დოკუმენტში, რომელიც საკრებულომ 25 დეკემბრამდე უნდა დაამტკიცოს.

თბილისის ბიუჯეტთან დაკავშირებით კომენტარი ოპოზიციის წარმომადგენლებს გუშინ არ გაუკეთებიათ.