ეუთო მოუწოდებს რუსეთს შეასრულოს შეთანხმება ცეცხლის შეწყვეტის შესახებ და გააუქმოს ოკუპირებული ტერიტორიების დამოუკიდებელ სახელმწიფოებად აღიარება.
2008 წლის რუსეთ-საქართველოს ომის შემდეგ, პირველად, ეუთო-ს მინისტრთა საბჭოს სხდომაზე საქართველოს მეგობარი ქვეყნების მიერ გაკეთდა განცხადება კონფლიქტის თემაზე, რომელიც შევა მინისტერიალის დოკუმენტთა პაკეტში.
საქართველოს საგარეო საქმეთა სამინისტროს ცნობით, მეგობარი ქვეყნები სრულ მხარდაჭერას უცხადებენ საქართველოს სუვერენიტეტსა და ტერიტორიულ მთლიანობას, საერთაშორისოდ აღიარებულ საზღვრებში.
ისინი მხარს უჭერენ ჟენევის საერთაშორისო მოლაპარაკებებს, როგორც მნიშვნელოვან ფორმატს, რომლის ფარგლებშიც ხდება 2008 წლის აგვისტოს ომის შედეგების განხილვა.
ეუთოში კონფლიქტის შესახებ მიღებულ განცხადებას საგარეო საქმეთა და შერიგებისა და სამოქალაქო თანასწორობის საკითხებში მინისტრები გამოეხმაურნენ.