29 ადამიანი დაიღუპა და 166 დაშავდა სტამბოლის ცენტრში მომხდარი ორი ძლიერი აფეთქების შედეგად. დაღუპულთა უმეტესობა სამართალდამცველია. ინფორმაცია თურქეთის შინაგან საქმეთა მინისტრმა გამთენიისას გამართულ პრესკონფერენციაზე დაადასტურა.

მისივე ინფორმაციით, 23 დაშავებულის მდგომარეობა მძიმეა.

მომხდარს გამოეხმაურა პრეზიდენტი ერდოღანი. მან მსხვერპლის გამო მწუხარება გამოთქვა და მომხდარი ტერორისტულ თავდასხმად მოიხსენია.

ორი ძლიერი აფეთქება სტამბოლში, ბეშიქთაშის უბანში, Vodafone Arena-სთან 10 დეკემბერს, ადგილობრივი დროით 23.00 საათზე მოხდა. ქვეყნის შინაგან საქმეთა სამინისტროს ცნობით, ჯერ სპეცრაზმის ავტობუსთან დანაღმული ავტომობილი აფეთქდა, ხოლო შემდეგ იქვე მდებარე მაჩხის პარკთან თვითმკვლელმა ტერორისტმა აიფეთქა თავი.

თვითმხილველთა თქმით, აფეთქებების შემდეგ, გაისმა გასროლის ხმაც.

ოფიციალური ინფორმაციით, მომხდართან დაკავშირებით, დაკავებულია 10 ეჭვმიტანილი.

აფეთქებებზე პასუხისმგებლობა არცერთ დაჯგუფებას არ აუღია.

აღსანიშნავია, რომ სტადიონზე, რომლის სიახლოვესაც აფეთქება მოხდა, დღეს საფეხბურთო მატჩი გაიმართა, თუმცა ის აფეთქების მომენტში დაახლოებით საათ-ნახევრის დასრულებული იყო.

მედიისა და აქტივისტების ცნობით, აფეთქების ხმა ახლომდებარე უბნებშიც გაიგეს. ძლიერი ნათებისა და კვამლის დანახვა შორიდანაც იყო შესაძლებელი.

სტამბოლში მომხდარ აფეთქებებს გამოეხმაურნენ ევროკავშირის ლიდერები და მსხვერპლის გამო მწუხარება გამოთქვეს.

მომხდარის შემდეგ, ინფორმაცია გაავრცელა საქართველოს საგარეო საქმეთა სამინისტრომ. უწყების განცხადებით, სტამბოლში, საქართველოს გენერალურ საკონსულოში ცხელი ხაზი მოქმედებს.

საგარეო უწყების ინფორმაციით, სტამბოლში საქართველოს გენერალური საკონსულო მუდმივ კავშირზეა თურქეთის საგანგებო სიტუაციებზე პირველადი რეაგირების ჯგუფთან და თურქული მხარე ამ ეტაპზე დაღუპულთა და დაშავებულთა შორის საქართველოს მოქალაქეების არსებობას არ ადასტურებს.

გამოყენებული წყაროები: BNO News, CNN TÜRK, aljazeera, BBC, Reuters