რომან შამათავას ბრალდების საქმეზე სასამართლომ ბოლო მოწმეს მოუსმინა, სადაც კუდ-ის აფხაზეთის სამმართველოს ყოფილ უფროსს პროკურატურა თავდაცვის სამინისტროს დაზვერვის ოფიცრის პაატა ქარდავასთვის თავისუფლების უკანონოდ აღკვეთასა და მკვლელობას, ასევე სატყეო დეპარტამენტის მეტყევე-რეინჯერის დავით ცინდელიანის მკვლელობას ედავება.
სასამართლოზე ბრალდებულის წერილიც გამოაქვეყნეს, რომლის მიხედვითაც, კუდ-ის ყოფილი მარალჩინოსანი მისთვის წარდგენილ ბრალდებებს კატეგორიულად უარყოფს და უარს ამბობს არსებით განხილვაში მონაწილეობაზე.
საქმე უკვე დასკვნით ეტაპზეა. მტკიცებულებათა გამოკვლევის დასრულების შემდეგ, მხარეები სასამართლოს წინაშე დასკვნითი სიტყვებით წარდგებიან, განაჩენი კი შესაძლოა წლის ბოლომდე გამოცხადდეს.
რომან შამათავა ამ ეტაპზე სასჯელს სხვა სისხლის სამართლის საქმეზე იხდის, მას უფლებამოსილების გადამეტების ფაქტზე 4 წლითა და 6 თვით თავისუფლების აღკვეთა აქვს მისჯილი.