რელიგიის თავისუფლების კუთხით ქვეყანაში ვითარება გაუარესებულია - ამ დასკვნას საკუთარ კვლევაზე დაყრდნობით „ადამიანის უფლებების სწავლებისა და მონიტორინგის ცენტრი“ აკეთებს.
არასამთავრობო ორგანიზაცია აცხადებს, რომ ამას ადასტურებს მუსლიმი თემის მიმართ გამოვლენილი რელიგიური კონფლიქტების ციკლი. მათ შორის, ნიგვზიანის, წინწყაროს, მოხეს, ჭელას და ქობულეთის ინციდენტები.
საკითხს ორგანიზაციამ სპეციალური კვლევა მიუძღვნა, რომლის განხილვაც დღეს, დილიდან დისკუსიის რეჟიმში წარიმართა. კონფერენციას რელიგიური უმცირესობების წარმომადგენლები დაესწრნენ.
როგორც კვლევის ავტორები, ასევე რელიგიური ორგანიზაციები აცხადებენ, რომ მთავრობის დაქვემდებარებაში მყოფი რელიგიის საკითხთა სახელმწიფო სააგენტო არ არის ეფექტური და ხშირად მისი მონაწილეობა რელიგიურ კონფლიქტებს კიდევ უფრო ამწვავებს.
დისკუსიის მონაწილეებმა სააგენტოს გაუქმებაც მოითხოვეს. კონფერენციაზე რელიგიის სააგენტოს ხელმძღვანელიც იყო მიწვეული, თუმცა ის შეხვდრაზე არ მივიდა.