საბანკო ბაზარზე გამსხვილების პროცესი გრძელდება. ამჯერად "საქართველოს ბანკმა" "პროკრედიტის" მიკრო და მცირე ბიზნესის 45 მილიონიანი პორტფელი იყიდა.

გარიგების ფინანსური დეტალები უცნობია, თუმცა "პროკრედიტში" განმარტავენ, რომ ქართული ბაზრიდან გასვლას არ აპირებენ და გაყიდული წილი, მთლიანი პორტფელის დაახლოებით მხოლოდ 12 პროცენტს შეადგენდა.

აღსანიშნავია, რომ ამ გარიგებით საქართველოს ბანკი მიკრო და მცირე ბიზნესის სეგმენტში, პოზიციების გაძლიერებას გეგმავს.

პორტფელის შეძენით "საქართველოს ბანკის" სასესხო პორტფელის წმინდა ღირებულება 120 მლნ. ლარით გაიზრდება.

გარიგება ძირითადად ეხება ინდივიდუალურ სესხებს, რომელიც ასი ათას დოლარზე ნაკლები ღირებულებისაა.

შეგახსენებთ, რამდენიმე წლის წინ 21 მილიონიანი პორტფელი, "პროკრედიტმა" "თიბისი" ბანკსაც მიყიდა.

ბანკების ასოციაციაში გამსხვილების პროცესს დადებითად აფასებენ და ამბობენ, რომ მომხმარებლები უკეთესს სერვისს მიიღებენ, ეკონომისტები კი აქცენტს ნაკლებ-კონკურენტულ გარემოზე აკეთებენ.