საბანკო ბაზარზე გამსხვილების პროცესი გრძელდება. ამჯერად "საქართველოს ბანკმა" "პროკრედიტ ბანკის" მიკრო და მცირე ბიზნესის 45- მილიონიანი პორტფელი იყიდა.

გარიგების ფინანსური დეტალები უცნობია. "პროკრედიტში" დღეს განმარტავენ, რომ ქართული ბაზრიდან გასვლას არ აპირებენ და გაყიდული წილი მთლიანი პორტფელის მხოლოდ დაახლოებით 12 პროცენტს შეადგენდა.

აღსანიშნავია, რომ ამ გარიგებით საქართველოს ბანკი მიკრო და მცირე ბიზნესის სეგემენტში პოზიციების გაძლიერებას გეგმავს.

პორტფელის შეძენით "საქართველოს ბანკის" სასესხო პორტფელის წმინდა ღირებულება 120 მლნ ლარით გაიზრდება. გარიგება ძირითადად ეხება ინდივიდუალურ სესხებს, რომელიც ასი ათას დოლარზე ნაკლები ღირებულებისაა.

შეგახსენებთ, რამდენიმე წლის წინ 21 მილიონიანი პორტფელი "პროკრედიტმა" "თიბისი ბანკსაც" მიჰყიდა.

ბანკების ასოციაციაში გამსხვილების პროცესს დადებითად აფასებენ და ამბობენ, რომ მომხმარებლები უკეთეს სერვისს მიიღებენ, ეკონომისტები კი აქცენტს ნაკლებკონკურენტულ გარემოზე აკეთებენ.