გაზით გარდაცვალების უკვე ხუთი შემთხვევა თბილისში. ბოლო ფაქტი წყნეთის ქუჩაზე დაფიქსირდა.
სავარაუდოდ, წყლის გამაცხელებელმა ბებია და შვილიშვილი იმსხვერპლა. მსხვერპლია ფონიჭალაშიც. ბინაში, სადაც სამი ადამიანი დაიღუპა, ე.წ. ნიკალას ტიპის გამათბობელი იყო დამონტაჟებული. ორივე შემთხვევაში არასრული წვის შედეგად, მხუთავი აირის დაგროვების ვერსია განიხილება.
სამართალდამცავები ახლა არკვევენ, იყო თუ არა შემოწმებული ,,ყაზტრანსგაზის” მხრიდან მითითებული საცხოვრებელი ბინები. ამ მიზნით მოკვლევა ტარდება თავად კომპანიაშიც. გამოძიების დასრულებამდე კი ,,ყაზტრანსგაზ-თბილისი” მოსახლეობას განსაკუთრებული სიფრთხილისკენ მოუწოდებს.
მთავარი რეკომენდაცია გამათბობლების ყიდვის დროს სპეციალური ინსტრუქციების დაცვაა. კომპანია მოქალაქეებს ბუნებრივი აირის დანადგარების რეგულარულ ტექნიკურ შემოწმებასაც სთხოვს.