სიღნაღიდან სამ კმ-ში, სოფელ ნუკრიანში კულტურის სახლში ხანძარი იყო.

„მოამბის“ კორესპონდენტის ინფორმაციით, ხანძარი გაჩნდა კულტურის სახლში, სადაც განთავსებულია იუსტიციის სამინისტროს საზოგადოებრივი ცენტრი, ბიბლიოთეკა და რამდენიმე სხვადახვა ორგანიოზაციის ოფისი.

როგორც „მოამბესთან“ საუბრისას სიღნაღის მუნიციპალიტეტის გამგებელმა დავით ჯანიკაშვილმა განაცხადა, ინფორმაცია ხანძრის შესახებ მას 23:00 სათისათვის შეატყობინეს.

მისივე ინფორმაციით, გამოძახებულ იქნა არამარტო სიღნაღის, არამედ დედოფლისწყაროს, ყვარლისა და საგარეჯოს სახანძრო ეკიპაჟები.

როგორც საზოგადოებრივ მაუწყებელს საგანგებო სიტუაციების მართვის სააგენტოში განუცხადეს, ხანძარი 500-600 კვ.მ ფართზე გაჩნდა. ხანძარი ლოკალიზებულია.

მათივე ცნობით, ადგილზე ათი სახანძრო მანქანა მუშაობს, მიმდინარეობს სალიკვიდაციო სამუშაო.

„ხანძარი 500-600 კვ.მ-ზე გაჩნდა, დამწვარია შენობის ჭერი. ორსართულიან შენობაში იუსტიციის სამინისტროს საზოგადოებრივი ცენტრისა და კულტურის სახლის გარდა განთავსებულია „ლიბერთი ბანკის“ ფილიალი, რომელიც მეხანძრეებმა გადაარჩინეს“,- განაცხადეს საგანგებო სიტუაციების მართვის სააგენტოში.

ხანძრის გამომწვევი მიზეზი ჯერჯერობით უცნობია, თუმცა ერთ-ერთი ვერსიით, ხანძრის მიზეზი ელექტროსადენის დაზიანება გახდა.