ანკარაში მომხდარი შემზარავი მკვლელობის გამო თურქ კოლეგას პირადად მიუსამძიმრა საქართველოს პრემიერმა, რომელიც სტამბულში იმყოფება. #ტერაქტი
ბინალი ილდირიმთან ერთად გამართული პრეს-კონფერენცია სწორედ რუსეთის ელჩზე მომხდარი თავდასხმის შეფასებებით დაიწყო.
გიორგი კვირიკაშვილი ბოლო პერიოდში თურქეთში მომხდარ ტერაქტებს მკაცრად გმობს და საქართველოს მთავრობის სახელით თურქეთის ხელისუფლებას და ტერორისტული აქტების შედეგად დაღუპულთა ოჯახებს მხარდაჭერას უცხადებს.
დოლმაბაჰჩეს სასახლეში გამართულ შეხვედრამდე პრემიერი ბეშიქთაშის სტადიონის ტერიტორიაზე მივიდა, სადაც 10 დეკემბერს მომხდარ ტერორისტულ აქტს ათობით ადამიანი ემსხვერპლა. საქართველოს მთავრობის მეთაურმა ტერაქტის ადგილი ყვავილებით შეამკო.
ვიზიტის დასასრულს გიორგი კვირიკაშვილმა „ევრაზიის გვირაბის“გახსნის ცერემონიაში მიიღო მონაწილეობა. ზღვის ქვეშ გაყვანილი 14,6 კილომეტრი სიგრძის გვირაბი ევროპისა და აზიის კონტინენტებს ერთმანეთთან დააკავშირებს, რაც „აბრეშუმის გზის“ აღდგენის პროცესში მნიშვნელოვან წვლილს შეიტანს.