ბერლინში საშობაო ბაზრობაზე განხორციელებულ თავდასხმაზე პასუხისმგებლობა "ისლამურმა სახელმწიფომ" აიღო.
ამის შესახებ ინფორმაციას ისლამისტებთან დაკავშირებული ერთ-ერთი სააგენტო ავრცელებს. მათი განმარტებით, სატვირთო ავტომობილის მძღოლი, რომელიც საშობაო ბაზრობაზე ქვეითად მოსიარულეებს დაეჯახა, "ისლამური სახელმწიფოს" ჯარისკაცია.
ის შეერთებული შტატების ხელმძღვანელობით მოქმედი ანტიჯიჰადისტურ კოალიციაში შემავალი ქვეყნების მოქალაქეებზე თავდასხმის შესახებ ISIS -ის მეთაურების მიერ გაკეთებულ განცხადებებს თავისი ქმედებით გამოეხმაურა.
გერმანელი სამართალდამცველები მას ამ დრომდე ეძებენ. ის მიმალვაშია. თავდასხმიდან რამდენიმე საათში დაკავებული პირი კი სამხილების არარსებობის გამო უკვე გათავისუფლებულია. თავდასხმა ბერლინში 19 დეკემბერს მოხდა. შემთხვევის შედეგად დაიღუპა 12 და მძიმედ დაშავდა 48 ადამიანი.