გარემოსა და ბუნებრივი რესურსების დაცვის სამინისტროს ორგანიზებით და აშშ-ს საერთაშორისო განვითარების სააგენტოს (USAID) “მმართველობა განვითარებისათვის” მხარდაჭერით, სასტუმრო „ამბასადორში“, პროექტის - “წყლის რეციკლირების და ჩამდინარე წყლების გაწმენდის ინოვაციური ტექნოლოგიები“ ფარგლებში, დაინტერესებულ მხარეთა კონფერენცია გაიმართა.

პროექტის ძირითადი მიზანია მდინარე არაგვის საპილოტე აუზში სამრეწველო სექტორის მიერ წყლის გამოყენების შეფასება და წყლის გამოყენების და ჩამდინარე წყლების გაწმენდის ეფექტური ტექნოლოგიების გამოყენების შესაძლებლობების მოძიება.

კერძოდ, პროექტის ფარგლებში განხორციელდა მდინარე არაგვის აუზში სხვადასხვა ტიპის სამრეწველო ობიექტების მიერ წყლის გამოყენების და ჩამდინარე წყლების მართვის არსებული პრაქტიკის შესწავლა და ანალიზი, რისი გათვალისწინებითაც, უცხოელი ექსპერტების მიერ მომზადდა სარეკომენდაციო სახელმძღვანელო
ჩამდინარე წყლების გაწმენდის ეფექტური მეთოდების შესახებ.

კონფერენციაზე პროექტის ძირითადი შედეგები წარმოადგინეს. ასევე, გაიმართა აღნიშნული სახელმძღვანელოს პრეზენტაცია, რომელიც დაეხმარება საქართველოში არსებულ სამრეწველო ობიექტებს, გაეცნონ და საჭიროებისამებრ დანერგონ წყლის გამოყენების ხარჯთეფექტური ტექნოლოგიები, რომლებიც ერთი მხრივ იქნება რესურს-დამზოგავი და მეორე მხრივ, უზრუნველყოფს მათ შესაბამისობას ახალ საკანონმდებლო მოთხოვნებთან.

პროექტს ახორციელებს ორგანიზაცია GEO (Georgia’s Environmental Outlook). კონფერენციაში მონაწილეობა სახელმწიფო, საერთაშორისო და არასამთავრობო ორგანიზაციების და ბიზნესსექტორის 70-ზე მეტმა წარმომადგენელმა მიიღო.