გერმანიის პოლიცია ტუნისელ მამაკაცს ეძებს, რომლის პირადობის მოწმობა სატვირთო მანქანაში აღმოაჩინეს, რომელიც ორშაბათს ბერლინში საშობაო ბაზრობაზე ხალხმრავალ ადგილზე შევარდა.
გერმანული მედიის ინფორმაციით, მამაკაცი 21 ან 23 წლისაა. პოლიციას აღნიშნულზე კომენტარი ჯერ არ გაუკეთებია. ბერლინში განხორციელებულ ტერაქტზე პასუხისმგებლობა ე.წ ისლამურმა სახელმწიფომ აიღო.
ტერორისტები აცხადებენ, რომ თავდასხმის ორგანიზატორი მათ რიგებშია. მანამდე კი ტერაქტის მოწყობის ბრალდებით, სამართალდამცველებმა პაკისტანელი დააკავეს, რომელიც პროკურატურამ გაათავისუფლა, რადგან მისი ბრალეულობა არ გამოიკვეთა.
სისხლიანი თავდასხმა ბერლინის ცენტრში მდებარე ეკლესიასთან, საშობაო ბაზრობის ტერიტორიაზე მოხდა. შედეგად დაიღუპა 12 და დაშავდა რამდენიმე ათეული ადამიანი.