საქართველოში სტიქიას ერთი ადამიანის სიცოცხლე ემსხვერპლა. სვანეთში ჯვარი-მესტიის გზაზე, ხაიშის მონაკვეთზე ზვავი ჩამოწვა. გარდაცვლილი ადგილობრივი მამაკაცია.
დიდთოვლობამ პრობლემები შექმნა ზუგდიდის რაიონშიც. მაღალმთიან სოფლებში ამ დრომდე იწმინდება შიდა გზები. თოვლმა ერთი სახლი მთლიანად დაანგრია,
საცხოვრებელთან დაკავშირებული პრობლემები აქვს 6 ოჯახს. რაიონს ელექტროენერგია შეფერხებით მიეწოდება, ადგილზე "ენერგო პრო ჯორჯიას" სპეციალისტები მუშაობენ,
ზუგდიდის რაიონის გამგეობაში სპეციალური კომისია შეიქმნა, რომელიც დაზარალებული ოჯახების მდგომარეობას სწავლობს.
მაღალმთიან აჭარაში კი გამოიდარა, თუმცა ამ დრომდე რჩება გადაადგილების პრობლემა. ყინვისა და უხვი ნალექის გამო საავტომობილო მოძრაობა შეზღუდულია ხულოსა და შუახევში, აქ მხოლოდ ორხიდიანი და მაღალი გამავლობის ავტომობილითაა შესაძლებელი მოძრაობა.
მაღალი ზონის სოფლებში თოვლის საფარი სამ მეტრს, ხოლო გოდერძის უღელტეხილზე 4 მეტრს აღწევს. ჩაკტილია შიდა სასოფლო გზები. როგორც მუნიციპალიტეტებში აცხადებენ, გაწმენდით სამუშაოებს ძლიერი ყინვა აფერხებს.