საქართველოს პრემიერმინისტრი თბილისის ოპერისა და ბალეტის თეატრში ხანუქის დღესასწაულისადმი მიძღვნილ საზეიმო კონცერტს დაესწრო.
მთავრობის მეთაურმა ებრაელ ხალხს დღესასწაული მიულოცა და მათ წინსვლა და კეთილდღეობა უსურვა.
„მინდა ჩვენს მოძმე ებრაელ ერს მივულოცო ხანუქას დღესასწაული. ეს არის განახლების, სამართლიანობის დღესასწაული, რაც თავისთავად გულისხმობს სინათლის ბნელზე გამარჯვებას. ამ ყველაფერში უდიდესი სიმბოლიზმია ჩადებული. არ არსებობს დედამიწის ზურგზე სხვა ერი, რომელთანაც შეიძლება ამდენი საერთო ჰქონდეს საქართველოს. ეს არის ებრაელი ერი, რომელთანაც ათობით საუკუნის მეგობრობა გვაკავშირებს. ეს არის ის უძლიერესი ემოციონალური საწყისი, რომელზეც დგას ჩვენი მეგობრობა და ძმობა. არ არსებობს არც ერთი სხვა სახელმწიფო, რომლის გამოცდილებაც ასე მიესადაგება საქართველოს, არა მხოლოდ გამოწვევების, არამედ შესაძლებლობების კუთხით. ამიტომ მე ვისურვებდი, რომ 2017 წელი ყოფილიყოს იმ უდიდესი მეგობრობის, ძმობის, რომელიც ჩვენს ერებს შორის არსებობს; ასევე დიდ პარტნიორობაში და სახელმწიფოთა შორის ძალიან ფართო თანამშრომლობაში ტრანსფორმაციის წელი. ეს ყოფილიყოს დასაწყისი უდიდესი თანამშრომლობის, რომლის შედეგიც იქნება ჩვენი ორივე ქვეყნის უდიდესი წარმატება“, - განაცხადა პრემიერმა სიტყვით გამოსვლისას.
გიორგი კვირიკაშვილის თქმით, ისრაელი მსოფლიოში ცნობილია, როგორც სტარტაპ ქვეყანა, ხოლო საქართველოს აქვს ყველა წინაპირობა, რომ ისრაელის გამოცდილების გამოყენებით, გახდეს ასეთივე ძლიერი სახელმწიფო, როგორიც დღეს არის ისრაელი.
„ჩვენ ძალიან დიდი იმედი გვაქვს, ჩვენი ებრაელი მეგობრების, ჩვენი მოძმე ერის დახმარების. იცოდეთ, რომ საქართველო ყოველთვის იდგა ებრაელი ხალხის გვერდით და ასე იქნება მომავალშიც“, - აღნიშნა გიორგი კვირიკაშვილმა.
საზეიმო საღამოს, პრემიერმინისტრთან ერთად, საქართველოს პარლამენტის თავმჯდომარე ირაკლი კობახიძე, ისრაელის სახელმწიფოს საგარეო საქმეთა მინისტრის მოადგილე ციპი ხოტოველი და ისრაელის ქნესეთის დელეგაციის წევრები დაესწრნენ, რომლებიც სამდღიანი ვიზიტით საქართველოში იმყოფებიან.