ეს არის მნიშვნელოვანი დოკუმენტი, რომელიც განსაზღვრავს საქართველოსა და ამერიკის შეერთებულ შტატებს შორის თანამშრომლობას, - ასე შეაფასა საქართველოს საგარეო საქმეთა მინისტრმა ბარაკ ობამას მიერ ხელმოწერილი კანონი ამერიკის შეერთებული შტატების 2017 წლის სამხედრო ბიუჯეტის შესახებ.
თეთრი სახლის მიერ გავრცელებულ განცხადებაში ნათქვამია, რომ დოკუმენტი ითვალისწინებს „პირველ რიგში, ხარჯებს აშშ-ის თავდაცვის სამინისტროს პროგრამებზე. ასევე, სამხედრო მშენებლობასთან და ეროვნულ უსაფრთხოებასთან დაკავშირებულ პროექტებზე“.
დოკუმენტში ასევე ვკითხულობთ, რომ „საქართველო აშშ-ის ღირებული მეგობარია და ამერიკა კიდევ ერთხელ ადასტურებს საქართველოს სუვერენიტეტისა და ტერიტორიული მთლიანობის მხარდაჭერას საერთაშორისოდ აღიარებული საზღვრების ფარგლებში და არ აღიარებს რუსეთის ფედერაციის მიერ ოკუპირებული აფხაზეთისა და ე.წ. სამხრეთ ოსეთის დამოუკიდებლობას“.