სოფელ მოხეს საჯარო სკოლის მუსლიმმა მოსწავლეებმა პროტესტის ნიშნად, დღეს, სწავლა შეწყვიტეს. ისინი სოლიდარობას მუსლიმ გოგონას უცხადებენ. როგორც მოსწავლეები ამბობენ, სკოლის დირექტორმა მეთორმეტე კლასელ გოგონას სკოლაში თავსაფრით მისვლა აუკრძალა.
მოსწავლეთა ნაწილი დირექტორის გადადგომას ითხოვს. თავად სკოლის დირექტორი კი აცხადებს, რომ მსგავს შემთხვევას ადგილი არ ჰქონია და სკოლაში თავსაფრით სიარული არავისთვის აუკრძალავს.
როგორც მუსლიმი თემი, ისე მართლმადიდებელი მოსახლეობა ითხოვს, ადგილზე ვითარების შესასწავლად უფლებადამცველები და განათლების მინისტრი ჩავიდნენ.
„ი-ემ-სი-ს" იურისტი მიიჩნევს, რომ აუცილებელია მომხდარის შესწავლა და თუ მსგავსი შემთხვევა გამოვლინდა, შესაძლოა, დირექტორის დისციპლინარული პასუხისმგებლობის საკითხი დადგეს.