პარლამენტის იურიდიული კომიტეტის თავმჯდომარის, ეკა ბესელიას განცხადებით, პარლამენტმა „მაუწყებლობის შესახებ“ კანონში უნდა შეიტანოს ცვლილებები, რითაც, ბესელიას თქმით, თავიდან იქნება აცილებული არსებული საკანონმდებლო ხარვეზები, რაც საზოგადოებრივი მაუწყებლის სამეურვეო საბჭოსა და დირექტორის საქმიანობაში არსებობს.

„მოქმედმა კანონმა პრაქტიკაში ძალიან ბევრი ხარვეზი წარმოქმნა, ბევრ წინააღმდეგობას აწყდება კანონის ნორმა და არის გარკვეული კოლიზია უფლებამოვალეობებსა და უფლებამოსილებებს შორის, სადაც იკვეთება სამეურვეო საბჭოს, დირექტორის უფლებამოსილებები და ამ მხრივ გარკვეული საკანონმდებლო პრობლემებიც არის, გარდა იმისა, რომ სამეურვეო საბჭო არის სრულად დასაკომპლექტებელი და ახლა უკვე დირექტორია ასარჩევი.

აქ არის კომპლექსური საკითხი, რომელსაც ალბათ პარლამენტი უნდა მიუბრუნდეს და უნდა მიუბრუნდეს არა მხოლოდ სამეურვეო საბჭოს წევრის არჩევის ნაწილში, არამედ ზოგადად, არჩევის წესი, დაკომპლექტების ფორმულა, კანონის სხვადასხვა მუხლები, რომლებიც აშკარად ქმნის გარკეულ პრობლემებს, ამიტომ, ჩვენ, ალბათ მომავალი წლიდან უნდა დავიწყოთ ამ საკითხზე სისტემური და ერთობლივი მუშაობა,”- განაცხადა ეკა ბესელიამ.

საზოგადოებრივი მაუწყებლის გენერალური დირექტორის არჩევის საკითხზე კომენტარი გააკეთა „ახალგაზრდა იურისტთა ასოციაციის“ თავმჯდომარე ანა ნაცვლიშვილმა.

მისი განცხადებით, მნიშვნელოვანი იქნება, რომ ეს პროცესი იყოს გამჭვირვალე, ღია და პროფესიონალიზმზე დაფუძნებული.

„თვალს ვადევნებთ მედიაში მიმდინარე მოვლენებს და რა თქმა უნდა, განსაკუთრებულად აქტუალურია საზოგადოებრივი მაუწყებლის ახალი დირექტორის შერჩევის პროცესი. მნიშვნელოვანი იქნება, რომ ეს პროცესი იყოს გამჭვირვალე, ღია და პროფესიონალიზმზე დაფუძნებული, სწორედ ეს იქნება გამოყენებული ახალი დირექტორის არჩევის დროს.

არსებობს კარგი პრეცედენტი აჭარის ტელევიზიისა და რადიოს ხელმძღვანელის არჩევის სახით, პროცესი ნამდვილად იყო გამჭვირვალე და სწორად წარიმართა. მნიშვნელოვანი იქნება, რომ ეს კარგი პრეცედენტი უკვე დამტკიცდეს და საზოგადოებრივი მაუწყებლის დირექტორიც ამ ფორმით და ამ ტიპის პროცედურით იქნეს შერჩეული. საზოგადოებრივი მაუწყებელი არის საზოგადოების და არ არის ერთი პარტიის ან სახელმწიფოს კუთვნილება.

როგორი პიროვნება იქნება ამ ტელევიზიის დირექტორი, ამას ძალიან დიდი პრაქტიკა და ასევე, სიმბოლური მნიშვნელობა ექნება“,- განაცხადა ნაცვლიშვილმა.

საზოგადოებრივ მაუწყებელში დირექტორის ასარჩევად კონკურსი მიმდინარეობს.

განაცხადების შეტანა მსურველებს 28 დეკემბრამდე შეუძლიათ.

სამეურვეო საბჭოს უკვე მიმართა შვიდმა კანდიდატმა: ბაჩუკი ბახტაძემ, რევაზ შალიბაშვილმა, ზაალ ანჯაფარიძემ, გიორგი ქავთარაძემ, ვასილ მაღლაფერიძემ, ნინო ზაუტაშვილმა და გურამ ფალავანდიშვილმა.