სამი კერძო ტელეკომპანია ცვლილებების მოლოდინშია.

ერთ ჰოლდინგში გაერთიანების შემდეგ „იმედი”, „მაესტრო” და GDS-ი ერთად მუშაობის პრინციპებზე თანხმდებიან.

„მაესტროში”, დღეს, „იმედის” სამეთვალყურეო საბჭოს თავმჯდომარე მივიდა. ირკვევა, რომ GDS-ი მხოლოდ გასართობი არხი იქნება, „მაესტრო” კი ამ ეტაპზე საინფორმაციო გამოშვებებს შეინარჩუნებს. თუმცა სადავო ხდება საკითხი: აძლევს თუ არა ერთ ჰოლდინგს კანონი უფლებას, რომ ორი საინფორმაციო სამსახური ჰქონდეს.

უთანხმოების მიზეზად რჩება ახალი მედიაგარიგებაც. „მაესტროს” წილების მფლობელი მამუკა ღლონტი ტელეკომპანიის საკონტროლო პაკეტის „იმედისთვის” მიყიდვას კანონდარღვევად აცხადებს.