საკანონმდებლო ორგანო საქართველოს საგარეო პოლიტიკის შესახებ მიღებული რეზოლუციის ტექსტს ავრცელებს. კანონმდებლებმა დოკუმენტი 91 ხმით არცერთის წინააღმდეგ გუშინ მიიღეს.
რეზოლუცია 12 პუნქტისგან შედგება. დოკუმენტში სტრატეგიულ პრიორიტეტებად ქვეყნის სუვერენიტეტის განმტკიცება, დეოკუპაცია და საქართველოს საერთაშორისოდ აღიარებულ საზღვრებში ტერიტორიული მთლიანობის აღდგენაა განსაზღვრული.
უალტერნატივო პრიორიტეტად ქვეყნის ევროკავშირსა და ნატოში გაწევრიანება, მთავარ სტრატეგიულ პარტნიორად კი ამერიკის შეერთებული შტატები სახელდება.
მოხდება მრავალმხრივი ურთიერთობების განვითარება გაერთიანებული ერების ორგანიზაციის, ევროპის უსაფრთხოებისა და თანამშრომლობის ორგანიზაციის, ევროპის საბჭოს, შავი ზღვის ეკონომიკური თანამშრომლობის ორგანიზაციის, სუამის და სხვა საერთაშორისო ორგანიზაციების ფორმატებში.
ქვეყანა, საერთაშორისო უსაფრთხოებისა და სტაბილურობის განმტკიცების მიზნით, მიმდინარე სამხედრო ოპერაციებში მნიშვნელოვანი წვლილის შეტანას, საერთაშორისო ტერორიზმთან და ორგანიზებულ დანაშაულთან ბრძოლას გააგრძელებს.
რეზოლუციაში ნათქვამია, რომ საქართველო, საერთაშორისო მექანიზმების გამოყენებით, რუსეთთან რაციონალურ პოლიტიკას განაგრძობს.