თურქეთის პოლიცია ღამის კლუბ „რეინაზე" თავდამსხმელის ფოტოებს ავრცელებს.

გავრცელებული ცნობით, ტერორისტს აზიური წარმოშობა აქვს. ცნობილი ხდება, რომ თავდასხმაზე პასუხისმგებლობა ტერორისტულმა ორგანიზაცია ე.წ. ისლამურმა სახელმწიფომ აიღო.

ჯიჰადისტების მიერ გავრცელებულ განცხადებაში ნათქვამია, რომ "ხალიფატის ჯარისკაცმა განახორციელა თავდასხმა კლუბზე, სადაც ქრისტიანები წარმართულ დღესასწაულს ზეიმობდნენ".

თურქეთის უმსხვილეს ქალაქში ღამის კლუბ “რეინა”-ზე თავდასხმას 39 ადამიანი ემსხვერპლა, 40-მა კი სხვადასხვა სიმძიმის დაზიანებები მიიღო. შეიარაღებული პირი კლუბში მაშინ შეიჭრა, როდესაც იქ მყოფი ხალხი ახალ წელს ზეიმობდა.

თავდამსხმელმა მიმალვა შეძლო, მას ამ დრომდე პოლიცია ეძებს. კლუბი პოპულარულია როგორც ადგილობრივებს, ისე უცხოელ ტურისტებს შორის. მსხვერპლთა შორის არიან საფრანგეთის, ბელგიის, რუსეთის, საუდის არაბეთის, ისრაელის, ლიბანის, ლიბიის, იორდანიის მოქალაქეები.

დაღუპულთა შორის სულ 16 უცხოელია. თავდასხმის დროს კლუბში 700-მდე ადამიანი იმყოფებოდა.