ისრაელის პოლიციამ პრემიერ-მინისტრი ბენიამინ ნეთანიაჰუ კორუფციის საქმის გამოძიების ფარგლებში დაკითხა, ამის შესახებ ინფორმაციას BBC ავრცელებს.
იუსტიციის სამინისტროს ინფორმაციით, პრემიერ-მინისტრს „ბიზნესმენებისგან გარკვეული სარგებლის მიღებასთან დაკავშირებით“ ჰკითხეს. ოფიციალური უწყებები დამატებით დეტალებზე არ საუბრობენ.
პრემიერის რეზიდენციაში გამომძიებლები ორშაბათს მივიდნენ, რის შემდეგაც ნეთანიაჰუმ გაავრცელა განცხადება, სადაც ამბობს, რომ ის უდანაშაულოა.
„არაფერი მოხდება, იმიტომ რომ არაფერი ყოფილა“ - განაცხადა ნეთანიაჰუმ.
ისრაელის პრემიერ-მინისტრი იერუსალიმის რეზიდენციაში სამი საათის განმავლობაში იკითხებოდა.
როგორც BBC ადგილობრივ მედიაზე დაყრდნობით წერს, ბენიამინ ნეთანიაჰუს ადანაშაულებენ, რომ მან ათასობით დოლარის ღირებულების „უკანონო საჩუქრები“ მიიღო ადგილობრივი და საერთაშორისო ბიზნესმენებისგან.
„ჩვენ მედიაში გავრცელებული ყველა ინფორმაცია მოვისმინეთ. ვნახეთ, რომ ტელეეთერებში სადღესასწაულო განწყობა და ატმოსფეროა, იგივე ვითარებაა ოპოზიციაშიც. მინდა ვუთხრა მათ, რომ ნაადრევად ნუ აღნიშნავენ“ - განაცხადა ნეთანიაჰუმ.