რუსეთის საგარეო საქმეთა სამინისტროში აცხადებენ, რომ რუსეთის ხელისუფლება ნატოს „ცივი ომის“ ანაქრონიზმად არ მიიჩნევს და ალიანსთან ურთიერთობების აღდგენის სურვილი აქვს.
ეს განცხადება რუსეთის საგარეო საქმეთა სამინისტროს საერთო ევროპული თანამშრომლობის დეპარტამენტის უფროსმა ანდრეი კელინმა გააკეთა.
მისი თქმით, რუსეთსა და ნატო-ს შორის უნდა აღდგეს ის ურთიერთობები, რომელიც ადრე არსებობდა.
„ბევრი ქვეყნისთვის ნატოს წევრობა მომგებიანია. მათ დამოუკიდებლად საგარეო პოლიტიკის წარმოება არ სჭირდებათ, საკმარისია, საერთო პოლიტიკის მონაწილე გახდე. ეს ორგანიზაცია ანაქრონიზმი არ არის“, – განუცხადა სააგენტო “ინტერფაქსს” რუსეთის საგარეო საქმეთა სამინისტროს წარმომადგენელმა ანდრეი კელინმა.
მისი თქმით, შეუძლებელია დაარწმუნო რომელიმე ქვეყანა, რომ ის ნატოს წევრი არ უნდა იყოს, ვინაიდან ეს სახელმწიფოები რაციონალიზმის ფაქტორებით ხელმძღვანელობენ.
კელინმა ასევე აღნიშნა, რომ ნატო არის რეალობა, ეს სამხედრო ფაქტორია და მასთან ურთიერთობების დალაგებაა აუცილებელი.
კელინის თქმით, ნატოს წევრ თითოეულ ქვეყანას არ სჭირდება ძლიერი ფლოტი,ავიაცია, სასაზღვრო ძალები, არამედ ალიანსში ეს ფუნქციები განაწილებულია, რაც ბევრად უფრო იაფი ჯდება.