გასაუბრების პირველი ეტაპი დასრულდა. სამეურვეო საბჭომ საზოგადოებრივი მაუწყებლის გენერალური დირექტორობის სამ კანდიდატს მოუსმინა.
საკუთარი გეგმები ბორდს თინათინ ბეერძენიშვილმა, ნათია კუპრაშვილმა და ზაალ ანჯაფარიძემ გააცნეს. ხვალ ტელევიზიის განვითარების ხედვას ნინო ზაუტაშვილი და ვასილ მაღლაფერიძე წარადგენენ. ზეგ კი რვაკაციანი ბორდი, ფარული კენჭისყრით, ახალ გენერალურ დირექტორს აირჩევს, რისთვისაც საბჭოს მინიმუმ ხუთი ხმაა საჭირო.
სარედაქციო დამოუკიდებლობა, მაღალი ჟურნალისტური სტანდარტების დამკვიდრება, აუდიტორიის კვლევა, მაუწყებლის წვდომის პრობლემის მოგვარება, ტექნიკური გადაიარაღება იმ პრიორიტეტების არასრული ჩამონათვალია, რომლებზეც თინათინ ბერძენიშვილმა გააკეთა აქცენტი.
გამარჯვების შემთხვევაში, ტელევიზიის სანდოობის ზრდაზე, საზოგადოებრივი ჩართულობის გააქტიურებასა და პროფესიონალი კადრების მოზიდვა-შენარჩუნებაზე გაამხვილებს ყურადღებას ზაალ ანჯაფარიძე.
ხედვის პრეზენტაციის დროს კრიტიკული იყო ნათია კუპრაშვილი, რომელსაც მაუწყებლის ბიუჯეტის, ინტეგრირებული ნიუსრუმის პროექტის და მაუწყებლობის დაფარვის მიმართ გარკვეული შენიშვნები აქვს.
შორენა ხვიჩია დეტალებით.