11-წლიანი პატიმრობის შემდეგ, გია გვიჩიანმა და ნიკოლოზ ჩემიამ, შესაძლოა, ციხე დატოვონ.
პროკურატურის მოთხოვნით, სააპელაციო სასამართლოში დაწყებული ხელახალი სასამართლო განხილვა ფინალურ ეტაპზეა.
„თელასის” ფინანსური მენეჯერის მკვლელობის საქმის დღევანდელ პროცესზე ის ექსპერტები დაიკითხნენ, რომლებიც ხელახლა ჩატარებულ საგამოძიებო მოქმედებებში მონაწილეობდნენ. მათ შორისაა დამოკიდებელი ექსპერტი მაია ნიკოლეიშვილი, რომელმაც წინა გამოძიების ვერსია უარყო. საუბარია ვერსიაზე, რომლის მიხედვით, ნიკა ლომინაძე 2002 წელს მაყუჩიანი იარაღით მოკლეს.
მომდევნო სხდომა 3 თებერვალს გაიმართება, 14 თებერვალს კი მხარეები დასკვნითი სიტყვით წარდგებიან, რის შემდეგაც მოსამართლე სათათბიროდ გავა.
შეგახსენებთ, რომ პროკურატურა წლების წინ გამოტანილი გამამტყუნებელი ვერდიქტის გამამართლებელი განაჩენით შეცვლას ითხოვს. არგუმენტად ხელახალი ძიების პროცესში გამოვლენილი ახალი გარემოებები სახელდება.