მაუწყებლის შესახებ კანონში ცვლილებებთან დაკავშირებით, სამუშაო ჯგუფი შეიქმნება. გადაწყვეტილება იურიდიულ საკითხთა კომიტეტმა მიიღო.
სამუშაო ჯგუფის წევრთა შემადგენლობა ჯერ განსაზღვრული არ არის, თუმცა ცნობილია, რომ მასში საზოგადოებრივი მაუწყებლის სამი თანამშრომელი შევა. ესენი არიან გოგა ჩართოლანი, დოდო შონავა და რევაზ ჭიჭინაძე.
მაუწყებლის თანამშრომელთა ნაწილი კანონის 30-ე მუხლის ცვლილებას ითხოვდა, რომელიც საზოგადოებრივი მაუწყებლის სამეურვეო საბჭოს უფლებამოსილებებს განსაზღვრავს.
საკანონმდებლო ცვლილების ინიციატორთა აზრით, ბორდი საზოგადოებრივი მაუწყებლის მაკონტროლებელი ორგანო უნდა იყოს, არსებული კანონმდებლობით კი, მას მენეჯერის ფუნქციები აქვს, რის გამოც ხშირად დირექტორისა და საბჭოს უფლებამოსილებები იკვეთება.