თბილისი-სენაკი-ლესელიძის საავტომობილო გზაზე მოძრაობა ნაწილობრივ აღდგენილია. გადაადგილება მხოლოდ მსუბუქი ავტომობილებისთვის არის დასაშვები.

გზების დეპარტამენტის ინფორმაციით, ზესტაფონის რაიონში, სოფელ შორაპანთან ისევ მეწყრის ჩამოწოლოს საფრთხეა. ადგილზე ამ დრომდე გეოლოგები მუშაობენ და ვითარებას სწავლობენ.

დიდი მოცულობის მთის მასივის ჩამოწოლის შედეგად, წუხელ, მთელი ღამის განმავლობაში აკრძალული იყო ყველა სახის ავტოტრანსპორტის მოძრაობა.

შემთხვევა გუშინ, დაახლოებით 21:00 საათიდან 22:00 საათამდე შუალედში მოხდა. ტერიტორიაზე ღამის განმავლობაში მობილიზებული იყო საავტომობილო გზების დეპარტამენტის სპეციალური ტექნიკა და საპატრულო პოლიცია, ხოლო ავტოტრანსპორტის მოძრაობა გომი-საჩხერე-ჭიათურა-ზესტაფონის გზით ხორციელდებოდა.

შემთხვევის შედეგად არავინ დაშავებულა.