პრემიერ-მინისტრმა გიორგი კვირიკაშვილმა თბილისის ცენტრში არსებულ ბარებზე მის მიერ გაკეთებულ განცხადებაზე დამატებითი განმარტება გააკეთა და აღნიშნა, რომ მისი მთავარი წუხილი ისაა, რომ „ქართველი არასრულწლოვნების ჩართვა ხდება პროსტიტუციაში“.

პრემიერის თქმით, ეს მისი, როგორც ამ ქვეყნის შვილის ღირსების შეურაცხყოფაა.

„დამატებითი განმარტება მინდა გავაკეთო მთავრობის სხდომის დაწყების წინ ჩემ მიერ გაკეთებულ განცხადებასთან დაკავშირებით, რადგან, როგორც დავაკვირდი, არასწორი ინტერპრეტირება მოხდა და არასწორი მიმართულებით წავიდა ის დასკვნები, რაც გამოიტანეს.

მე ვახსენე, რომ ბარებში ადგილობრივ, ქართული ეროვნების მამაკაცებს არ უშვებენ და რატომღაც, მოხდა ინტერპრეტირება, რომ თითქოს, მე იმაზე ვზრუნავ, რომ ქართველი მამაკაცები შეუშვან ღამის კლუბებში.

არა, მეგობრებო, ჩემთვის სამწუხარო ამ კლუბებში ხდება ის, რომ იქ არის პროსტიტუცია, მათ შორის არასწრულწლოვანი ჩვენი მოქალაქეების და არცერთი ქართველი მამაკაცი არ მოითმენს იმას, რაც იქ ხდება.

და სწორედ ამიტომ არ ხდება ქართველი მამაკაცების შეშვება ამ კლუბებში.

ეს არის მწვავე რეალობა, რომელიც გვაქვს და ამის წინააღმდეგ ზომების მიღება დავავალე შსს-ს და ასევე, სიტუაციის შესწავლა დავავალე ჩემს მრჩეველს, სოფო ჯაფარიძეს, რადგან შესაძლოა, ხდებოდეს ანტიდისკრიმინაციული კანონის დარღვევა იმ კუთხით, რომ უშვებენ მხოლოდ მდედრობითი სქესის ადამიანებს.

მთავარი წუხილი ჩემი ისაა, რომ ქართველი არასრულწლოვნების ჩართვა ხდება პროსტიტუციაში, ეს არის ჩემი, როგორც ამ ქვეყნის შვილის ღირსების შეურაცხყოფა“, - განაცხადა პრემიერმა.

პრემიერ-მინისტრმა გიორგი კვირიკაშვილმა მთავრობის სხდომის დაწყებამდე განაცხადა, რომ აქვს ინფორმაცია, თბილისის ცენტრში არსებულ ზოგიერთ ბარში ადგილობრივ მამაკაცებს არ უშვებენ და იქ შესვლა მხოლოდ ქალებს შეუძლიათ. პრემიერმა ყურადღება „ვარდების მოედნის“ ქვემოთ მდებარე ობიექტებზე გაამახვილა.