საქართველოს პრეზიდენტი გიორგი მარგველაშვილი თბილისში ოფიციალური ვიზიტით მყოფ ფრანკფურტის წიგნის ბაზრობის პრეზიდენტ იურგენ ბოსს, ვიცეპრეზიდენტ ტობიას ვოსს და პროგრამის ხელმძღვანელ სიმონე ბიულერს შეხვდა.
როგორც პრეზიდენტის მრჩეველმა სოფიო შამანიდმა განაცხადა, მხარეებმა ფრანკფურტის წიგნის ბაზრობაზე საქართველოს საპატიო სტუმარი ქვეყნის სტატუსით წარდგენის მოსამზადებელი სამუშაოების შესრულებისა და სამომავლო გეგმების შესახებ ისაუბრეს.
საქართველოს პრეზიდენტმა ქვეყნისათვის ფრანკფურტის წიგნის ბაზრობის მნიშვნელობაზე ისაუბრა და აღნიშნა, რომ საქართველო ამ საერთაშორისო ღონისძიებაზე სათანადოდ უნდა იყოს წარმოდგენილი, რადგან ეს ლიტერატურის და ზოგადად, ქართული კულტურის პოპულარიზაციაა.
როგორც შეხვედრაზე გერმანულმა მხარემ აღნიშნა, ქართული ლიტერატურა მაღალი დონით გამოირჩევა, სწორედ ესაა იმის მიზეზი, რომ საქართველოს ფრანკფურტის წიგნის ბაზრობაზე იწვევენ.
შეხვედრას ესწრებოდნენ საქართველოს პრეზიდენტის ადმინისტრაციის უფროსი გიორგი აბაშიშვილი, საგარეო ურთიერთობათა მდივანი თენგიზ ფხალაძე, საქართველოს პრეზიდენტის მრჩეველი ეთნიკური უმცირესობების საკითხებში სოფიო შამანიდი და ქართული წიგნის ეროვნული ცენტრის დირექტორი მედეა მეტრეველი.