საქართველოს კომუნიკაციების ეროვნული კომისია ელექტრონული კომუნიკაციებისა და მაუწყებლობის სფეროში საავტორო და მომიჯნავე უფლებების დაცვის ზედამხედველობას შემდეგი საკანონმდებლო ბაზის და საერთაშორისო ხელშეკრულებების საფუძველზე ახორციელებს: ,,ლიტერატურული და მხატვრული ნაწარმოებების დაცვის“ შესახებ ბერნის კონვენცია, „ისმო“ საავტორო უფლებების დაცვის შესახებ ხელშეკრულება, ,,საავტორო და მომიჯნავე უფლებების შესახებ“ და ,,მაუწყებლობის შესახებ“ საქართველოს კანონები.
კომისიამ შპს „Technomax LLP”-ს ხუთი ათასი ლარის ოდენობით ჯარიმა პირველად 2015 წლის 1 ოქტომბერს დააკისრა. კომპანია მაუწყებლობის ტრანზიტის მომსახურებას სავალდებულო ავტორიზაციის გარეშე ეწეოდა. საქართველოს ადმინისტრაციულ სამართალდარღვევათა კოდექსის 1441 მუხლის შესაბამისად, ელექტრონული კომუნიკაციების სფეროში ავტორიზაციის გარეშე საქმიანობისთვის განსაზღვრულია ხუთი ათასი ლარის ოდენობით ჯრიმა.
მოგვიანებით კომპანიამ მაუწყებლობის ტრანზიტის მომსახურებაზე გაიარა ავტორიზაცია, თუმცა საავტორო და მომიჯნავე უფლებების დარღვევის გამო საქნცია კიდევ ორჯერ დაეკისრა, რადგან შპს „TECHNOMAX LLP“ მიერ კომისიაში წარმოდგენილი ოფშორულ ზონაში (პანამა) რეგისტრირებული კომპანიის საავტორო და მომიჯნავე უფლებების ფლობის დამადასტურებელი დოკუმენტაცია არ აღმოჩნდა საქართველოს ტერიტორიაზე მოქმედი. აღნიშნული კომპანიის მიერ საავტორო და მომიჯნავე უფლებების დარღვევის ფაქტთან დაკავშირებით კომისიაში მოქმედი ოპერატორების, შესაბამისი სამაუწყებლო არხების რეტრანსლირების პირველადი უფლების მფლობელი კომპანიების და უცხოური არხების დილერი კომპანიების განცხადებებიც იყო წარმოდგენილი (სს“სილქნეტი“, შპს „კავკასუს ონლაინი“, „საქართველოს საკაბელო ქსელების კავშირი“, ასევე “EuroNews”, “National Geographic”, “Fox” და „Discavery“ და სხვა).