,,ანტონიო ტაიანის ევროპარლამენტის თავმჯდომარედ არჩევა მე როგორც იტალიელს და „წინ იტალიის’’ პარტიის თავმჯდომარეს, სიხარულსა და სიამაყეს მანიჭებს,’’ - ასე გამოეხმაურა იტალიის ყოფილი პრემიერმინისტრი სილვიო ბერლუსკონი „ფეისბუქის’’ პირად გვერდზე ანტონიო ტაიანის ევროპარლამენტის პრეზიდენტად არჩევას.

„იმ დროს, როდესაც ბევრი ევროპის იდეას განხილვის საკითხად აქცევს და სერიოზული პრობლემები გაურკვეველს ხდიან ევროკავშირის გზასა და პერსპექტივებს, დარწმუნებული ვარ, რომ ანტონიო ტაიანი კეთილსინდისიერად შეასრულებს თავის მოვალეობებს, რათა გააძლიეროს ევროპარლამენტის როლი’’, - აღნიშნა იტალიის ყოფილმა პრემიერმინისტრმა.

63 წლის ტაიანი წარსულში სილვიო ბერლუსკონის პარტიის სპიკერისა და ევროკომისრის თანამდებობას იკავებდა. ის ევროპარლამენტის პრეზიდენტის თანამდებობაზე გერმანელ მარტინ შულცს ჩაანაცვლებს.